Deu 25 | ZomZIV | STEP | Mite a kitot uh ciangin thukhen zumah kitun ding uh a, thukhente in a thu uh khensakin a mawhpengte zosakin a mawhte mawhpaih ding uh hi.

Deuteronomy 25

1 Mite a kitot uh ciangin thukhen zumah kitun ding uh a, thukhente in a thu uh khensakin a mawhpengte zosakin a mawhte mawhpaih ding uh hi. 2 A mawhpa sat thuaksak tuak ahileh thukhenpa in boksakin ama mawhna tawh kizui-a a sat zah vei ding a langpa muhin a sat ding hi; 3 ahi hangin sawmli vei val a sat kei ding hi. Tua zah sangin tamvei a kisat zawk leh no muhin na sanggampa uh a zahlaak lua kha ding hi. ^a

4 Bawngtal in an a cil laitakin a muk tuamsak kei un. ^b

5 Sanggam pasalte a tenkhawm sungin khat tapa nei loin a sih leh a meigongnu midang in a tenpih peuhmah kei ding hi. A pasal sanggampa in la-in tenpih dinga a nuphalpa maban khempeuh a cingsak ding hi. 6 Israel pan a sanggam sipa min a man loh nadingin tuanu tapa upa pen in a sanggam sipa min a pua ding hi.

7 Ahi zongin a sanggampa zi tuapa in a tenpih nop kei leh khua kongpi-a upate kiangah pai-in, “Ka pasal sanggampa in Israel sunga a sanggampa min a puak ding zom nuam lo hi. Amah in kei tungah a sanggampa nasep ding teng a tangtun kei hi,” a ci ding hi. 8 Tua ciangin khuapi upate in amah samin a hopih ding uh hi. Amah in, “Tuanu ka tenpih nuam kei hi,” a cih leh 9 a sanggampa zi meigongnu upate mai-ah pai to dinga, a khedap kaih a langkhat kaihkhiatsakin a maitang cilphih dinga,” a sanggampa innkuanpih gui a zomto nuam lote a kihici bawl ahi hi,” a ci ding hi. 10 Israel sungah tua mipa gui Khedap Kisuahsakte Innkuan, ci-in kithei ding hi.

11 Mi nih a kilai-a khatpa a zi in huhin a lawmpa a hutna-in a lawmpa kilaipihpa a zahmawhte ah a matsak leh 12 tuanu khut na sattansak ding uh hi. Amah na hehpih peuhmah kei ding uh hi.

13 Na ip sunguah tawisuang nih - a kikim lo azaang le agik nei kei un. 14 Na inn sunguah tehna nam nih - aneu le alian nei kei un. 15 TOPA note Pasian hong piak nading gamah na khansau theih nadingun a man le a kician khaina le tehna na nei pelmawh ding uh hi. 16 Ahang in, TOPA note Pasian in hih banga gamta peuhmah le a man lo-a sem peuhmah a kih hi. ^c

17 Egypt pan na paikhiat lai-un lampi-a, Amalekte hong bawlna phawk un. 18 Note gimin na cihmawh laitakun, na khualzinna-uah hong dawntuah uh a, a nunga vai nunung khempeuh hong ngawngtan uh hi; amaute in Pasian a kihta kei uh hi. 19 TOPA note Pasian in la-a na luah dingun hong piakna gamah na kim na pamua galte khempeuh panin note hong tawlngaksak ciangin van kikupsin nuai panin Amalekte a kiciamtehna na phiatkhia ding uh hi. Mangngilh kei un! ^d